Gen 37 | ATA | STEP | Ia Iakovo ne u'umesou tuala ne Kanani e momu Aisaki muxoxoo no anu ne uasi.

Genesis 37

Aipiepiena Noxou Iosepu

1 Ia Iakovo ne u'umesou tuala ne Kanani e momu Aisaki muxoxoo no anu ne uasi. 2 Muxoxoo ane, la sou nanasi'a ilo'a ta 'olu mikaukavunu muxolu aloxo 'o. Iosepu anu Iakovo 'olu maulu tauu iexu mumomomo loxo mavulovexa vile mo mulelia ta'uve mo muvaxa simi tamei (17). Anu ulavusou sou usaxila'a ta sipsip ilo'a ta mee noxou momu ilo'a ta vimovimou noxi'a Vila ilee Silipa. Ane'i ta sema tamei ne, momu ta semasemau. Ia anu mulai noxou momu la mua'alouxu 'ili'ilixone'i ta vimovimou e i'oxo'oxonu masumasua.

3 Iosepu ne, momu Iakovo ualasou vile lexe Isilaeli, anu umasaxai'a ta 'olu ia umasaxau Iosepu misevile mu'oki noxi'a. Xo nenu mivo'onu no mine anu Isilaeli ne aululu manina. Tava'u aloxo ne la sou momu mu'oxonu iu tokolomo vile lailaixe, utaa la ulai uxali no lia no tava'u, xe avolu veveeni. 4 Xe ta vimovimou milavu lexe mami'a anu umasaxau 'olu Iosepu misevile mu'oki noxi'a Iosepu ta vimovimou, la ane'i opone'i masuau vimo'a ne misevile mo ivivikala lailaixe ulai noxou uasi.

5 No 'olovoxo vile, la Iosepu muaipiepiena la mulai mua'aloi'a ta vimovimou aloxo 'o, “Ngalomu une'e noxilo mo aa'alomengixu aipiepiena noxilo 'o. Nenge'a telai no xai sou nenge'a tevovotu uiti tavatavalanu. Xe noxilo tavalanu muavuti la mutulu mulapu. Ia ta noxinge miavuti la mitulu mixaliliu noxilo ka mitangatuluou.” Xe ane'i milomu aloxo ne la la'iaxa'a misevile.

8 Xe miavuti la mitali'isou aloxo 'o, “Loxovaa, nini xavutalameni lexe nini sou naxali tila sou nasaxila'ixe?” Ane'i la'iaxa'a mu'oki'oki xo milomusou aipiepiena noxou xe vaivaikala ane anu mulemolusi'a.

9 Xe ili'i la Iosepu muaipiepiena alaxu vile la. Xe muavuti la muvikalane'i ta vimovimou aloxo 'o, “Eni eaipiepiena la, la emaisou aso xe so'io ilo'a ta oto mavulovexa mo mulelia vile mitulutulu no talaxo ka mitangatulu mulu'e noxilo.”

10 Xe muavuti la mulai noxou momu kalumo sou mua'aloxu aipiepiena noxou ne. Xe momu muavuti la mukaitolonu la muvikalanu lexe, “Aipiepiena ma'i to axoo ne? Loxovaa, nini nemasaxa lexe nexi noxie nenine mo ta viivine tane'e taxola'u tava'ixe mo tatangatulu sou tatoxoneni?” 11 ^aTa vimovimou ne, opone'i masua misevile ia mami'asi ne iou si'isou aipiepiena ne uasi, uxoxoolu la uxavuxavutalanu.

12 No voxo vile, la Iosepu ta vimovimou milailixa'a mami'a ta sipsipu ilo'a ta meeou ne Sikemu sou mi'ani ia'eia'e xe miie lexa. 13 Xe Iakovo muavuti la muvikalanu 'olu Iosepu aloxo 'o, “'Alixeni, eni emasaxaine lexe nalutu mo namuline'i ta viivine ulai ne Sikemu.” Xe Iosepu muavuti la muvikalanu momu lexe, “Ani, eni asou alutu alai.”

14 Xe momu muavuti la muvikalanu aloxo 'o la, “Nalai mo namaisi'a ta viivine lexe ane'i a laixene'isi. Mo namaisi'a ta sipsipxeni kalumo lexe laixene'isi. Nalai mo nakilisi'a lexe laixene'isi la sou nalivu une'e sou naa'aloxeni.” La sou momu mupalusou sou mulai mukilisi'a ta vimovimou. Ia momu ne, anu muxoxoo no vanunu ne Ebulon. Iosepu mumuamua'i xe mulai muxali ne Sikemu, la mulai muxixaoxao no lia xalee ane ne, la sou mumaisou itema vile la itema ne mutali'isou aloxo 'o, “Nakakamuli ma'ia?”

16 Xe Iosepu muavuti la muvikalanu lexe, “Eni akakamuline'i ta viivilo e mine'ene'i mamilo ta sipsipou sou ikamulixa'a lexa sou iiexu xe ia'eia'e sou i'ou. Nemaisi'a a ne'ei la napela'ilo mo amuline'i.”

17 Xe itema ne, muavuti la muvikalanu Iosepu lexe, “Ane'i a milutu mo milai. Elomusi'a mivivikala lexe ilai loxo ne Dotani.” La sou anu mumuline'i la mulai muxalisi'a ne Dotani. 18 Xe anu a uao no paxa, ia ane'i mimaisou mine anu umuamua'i ulai noxi'a, la ane'i mipotoxu sou lexe ivau usoli.

19 Ta motu miavuti la mivikalane'i ngato'o lexe, “Anu, itema sou aipiepiena a uxali 'o. 20 Tapalea mo tava'u soxu mo tasu'anu ulu'elai no lexa taxasou vile musii 'o. Ia talai la taa'alo lexe mii vile loxo laeoni muvau. La sou nenge tamalei lexe mii ma'ia ane uxali no anu aipiepiena noxou ne.”

21 Xe Luven mulomusi'a mivikala aloxo ne, la mukamuli vote'i sou upamaulinu Iosepu no anu. Muavuti la muvikalane'i aloxo 'o, “Nenge'a tava'u mamu. 22 Tatetelisousi ka talea ulu'elai no taxa sou lexa 'o no xalee lia vitanisi, ia ta'oxo masua loxo 'o uasi.” Anu mulosi'a vote'i ane ne xo anu mumasaxa lexe anu molu ulivu une'e sou ulivunoxu vimou utelo sou upalusou ulivu ulai noxou momu.

23 Iosepu mumuamua'i xe mune'e muxali noxi'a ta vimovimou ne, xe ane'i miavuti vaxa la mitetelisou ka milulusou tokolomo lailaixe e mutaanu, 24 ka sou miavuti la mi'itinu ka mileanu mulu'elai no lexa taxasou vile musii.

25 Mileanu maulamenge soxu loxo ne mukalu, ia ane'i milai mita'olu sou mi'ani. Mi'ani'ani ia mimalei la ta Isimaeli se'i ilo'a ta kamelii'a me'a loxo ne Xileati ia ilalai loxo ne Aixiputo. Ta kamelii'a mitavule mimii lailaixe loxo mii ane tuma'u laixe sou la'ilali mo lamalasile mo ovu vile lexaxu ane tuma'u laixe.

26 Xe Iuda muavuti la muvikalane'i ta vimovimou aloxo 'o, “Taemoso, lexe nenge tava'u vivinge usoli ka tatalumeiou, la mii ma'ia laixe ane nenge nenge'a taxalisou no anu xavutala ane ne? 27 Nenge'a tano'u mo talosi'a ta mitema e inene'e 'o mo ilotonu. Mo sou mamu nenge ta'oxo masuanu. Xo nenge vivinge maninasou ane. Nenge xiasinenge ilou sialunenge ane.” Xe ta vimovimou miavuti la mivikala lexe, “Ioxe, nenge tamulinu aloxo nelemolu ne.”

28 ^bXe ta mitema sou ivaivalo sou ino'u lamoli e mimaisi'a minene'e 'ole mine'e mixali 'alai noxi'a manina, la sou Iosepu ta vimovimou ne milai milaanu sou milosi'a. Ta Midiani milotonu Iosepu mulai noxi'a ta vimovimou no anu lamoli siliva alelaxu mavulovexa tamei. Milotonu mukalu, la sou mino'u milailixu ne Aixiputo.

29 Xe ili'i, la Luven mulivu no taxa e ane'i misu'anu vimo'a Iosepu no anu ne la umaisou vimou uasi. Xe muavuti la musinasinanu tokolomou no vasimolu ne xo tanuxu vimou misevile. 30 Xe mulivu mulai noxi'a ta vimovimou, la muvikalane'i lexe, “Ae, molomolo soxu 'ole a tasiauxu! Ka eni anavaa maasi?”

31 Xe ta motu miavuti la mivau mee vile ka mino'u sialuxu sou mi'unanu Iosepu tokolomou mulu'e no anu. 32 Xe ili'i la sou mino'u tokolomou ne mulai sou mimaxa'u noxou mami'a. Mixali la mivikalanu mami'a aloxo 'o, “Namaisou mii 'o. Nexi texalisou. Male 'iline miiu.”

33 Xe Iakovo iou muvaxa no anu tokolomou 'olu ne la mutongonu la muvikalane'i lexe, “Ani, 'alixe Iosepu tokolomou ane! Ta mii se'i loxo ta laeoni mivau 'alixeni ne mo mi'ou.”

34 Xe muavuti la musinasinanu tokolomou no vasimolu ne, io mutelonu tokolomo su'i sou tama xo tanuxu 'olu ne misevile. Muxoxoolu tanutanuxu 'olu mo mutatamasou ne maxuvee misevile. 35 Ta 'olu ta mulu mo ane ta sema mine'e noxou sou lexe ixolixolinu, la anu umasaxa lexe ane'i ine'e ixolixoli mamu. La sou muvikalane'i lexe, “Taletalelixu 'alixeni 'o mo atatamasou mole eni amulinu 'alixeni ulai no tualasi'a ta mitema sou soli ne ia ukalu uasi.” La sou anu muxolu sou mutamasou 'olu ne voxo se'i la.

36 Ioxe, ta Midiani e milotonu Iosepu noxi'a ta vimovimou ne, milailixu ne Aixiputo, la itema vile ualasou lexe Potipaa mulotonu, anu itema sou xaixai noxou tatananu tuala ne Aixiputo. Anu tila noxi'a ane'i ane sou isaxila'u taasou tatananu tuala.